உட்பொருளின் உட்பொருள்
====================================================ருத்ரா
பனி தூவும் காலையில்
நடை பயின்று கொண்டிருந்தேன்.
புத்தாண்டு
தன் அரிதாரங்களையெல்லாம்
கொஞ்சம் கொஞ்சமாய்
களைந்து விட்டிருந்தது.
காலத்தின்
காண முடியாத சித்திரத்தை
காலண்டர் தாள்களில்
நாம் அடுக்கி அடுக்கி
என்னத்தைக்கண்டோம் ?
ஒரு சொட்டுப்பரவசத்திற்கு
"வாங்க வாங்க " "குடம் நிறைக்கும் "
கண்ணீர்ப்பசுக்களாய்
அங்கும் இங்கும் ஓடுகிறோம்.
பிறப்பை அறு அறு
என்று
பஜனை ரம்பங்களால்
நம் ஆத்மா
ரத்த வெள்ளத்தில்
கிடந்தது தான் மிச்சம்.
உட்பொருளின் உட்பொருள்
அப்பொருளின் உட்பொருள்
அதற்குள்ளும் ஒரு உருப்பொருள்
உருப்பொருளின் கருப்பொருள்
..................
விஞ்ஞான மனிதன்
நுண்ணிதினும்
நுண்ணிதாய்
நுழைபுலம் சுருக்கினான்.
வைரஸ் உள்ளும் வைரச்சுரங்கம்
வெட்டி வெட்டி நுழைகின்றான்.
"தேடல்" என்பது
பிரபஞ்சங்களையும்
சுருட்டி சுருட்டி
அறிவின்
வாய் திணிக்கும்.
சுண்டல் அல்ல.
புளியோதரை அல்ல.
பிரசாதம்.
அந்த மின்னல் விழுதில்
உருகும் ஒளியின்
"குவாண்டம்" நெய் வழியும்
பிரசாதம் தேடி
அக்கோயில் நோக்கி நடக்கின்றேன்.
